طريقة عمل عجينة الميل في بالصور والخطوات

اولا المقادير للعجينة

حوالى كوب و نصف دقيق
180 جرام زبده جامده" من التلاجة يعنى مش بدرجة حرارة الغرفة "
كوب الا ربع ماء للعجن ممكن اكتر او اقل حاجة بسيطة حسب الدقيق
ذرة ملح


الطريقة


سهلة جدا والله مش صعبة

نجيب الدقيق على السطح الرخامى او الترابيزة " يكون سطح املس " و نعمله زى الهضبه كدا و نعمل فى قلبه حفره زى فوهة البركان

و بعدين نبتدى نضيف الماء داخل الحفرة و نلم الدقيق عليها و نعجن لغاية ما تتكون معانا عجينه مبتلزقش و تلم كل الدقيق اللى على السطح





بعدين نحط العجينه فى كيس نايلون فى التلاجة للمدة ربع الى نص ساعة عشان تكون ارتاحت و بردت و الزبدة ال هنضيفها متسيحش فيها بسهولة

بعد ربع ساعة نخرجها من التلاجة و نبتدى نفردها على هيئة مربع و نجيب قطعة الزبدة بتاعتنا و نحطها فى نص العجينة و نقفل جوانب العجينه عليها زى كدا




انا قطعت الزبدة قطع صغيرة نسبيا و وزعتها فى قلب العجينه


بعدين نقفل اهو



بعدين نبتدى نفرد بالنشابه



بعدين نطوى



و نرجع نفرد بالنشابه و ياريت لو مثلا فردنا بالطول و طوينا بالعرض
بعد كدا نفرد بالعرض و نطوى بالطول يعنى نحاول نفرد الزبده داخل العجينه فى كل الاتجاهات

و لو حسينا ان العجينه هتبتدى تلزق على السطح او ان الزبده بتخرج نحط العجين فى التلاجه ربع ساعة ترتاح و تجمد و نخرجها و نرجع نفردها و نطويها كمان كام طيه و نرش السطح بالدقيق رشات خفيفة ضرورى جدا النقطة دى لسهولة الفرد و عدم التصاق العجين

كل ما عمليه الطى و الفرد دى بتزيد كل ما بتدى معانا نتيجة مدهشة بعد كدا فى الخبز و الطعم

انا عملتها اربع مرات و بين كل مرةومرة كنت بريحها فى التلاجة ربع ساعة و ارجع اكمل

لغاية ما هنلاقى ان العجينة بقى لونها اصفر نتيجة انها شربت كل الزبدة اللى حطيناها و لما نفردها او نطويها مفيش زبدة هتخرج منها لانها دابت خلاص جواها

و طريقة فرد الزبدة فى العجينة بالشكل دا هو اللى بيخلى العجينه مورقة و هشه زى ما بنشوفها و بتديها الطعم المميز اللى كلنا بنحبه

المهم

دلوقتى العجينة جهزت عندنا خلاص و بقيت اخر تمام بالشكل دا



و فى مليون فكرة ممكن نستخدمها فيهم

انا عملت منها تورتة ميل فى و كمان اصابع الساليزون المدهشة بالبسطرمة

لو هنعمل تورتة ميل فى

هنفرد جزء من العجينة يعنى حوالى اربعين سم فى تلاتين و بنرققها جدا يا جماعة زى الصورة كدا بالظبط وانا عملتها كدا



و بعدين نحطها فى الصاج بتاعنا و نشكها بالشوكة عشان متنتفخش فى الخبز بالشكل دا



و انا دهنت الوش بيض و دخلتها الفرن على الشبكة فى الرف الاسفل لمدة ربع الىتلت ساعة تقريبا على نار متوسطة


و خرجت جميلة

بعد كدا عملت

الباسترى كريم

و مقاديرة

اتنين اصفر بيض مع بيضة كاملة
كوب و ربع لبن
فانيليا
ملعقة كبيرة نشا
ملعقة كبيرة دقيق
و ثلاث ملاعق سكر و نقلب ع البارد لغاية ما كل المكونات دى تندمج و تدوب مع بعض تماما و بعدين نبتدى نرفعها على النار و نقلب لغاية ما تتخن معانا و توصل للقوام المناسب وهو بيبقى تخين شويه زى الكاسترد كدا او اتخن كمان حاجة بسيطة

بعدين بنبتدى نجيب العجينة بتاعتنا واللى اصبحت رقاقة كبيرة هشه و جميلة و نقطعها نصين او ثلاثة على حسب عدد الطبقات اللى حابن نعملها لقالب التورته
و نهذب الجوانب كدا



و العجينة بيبقى شكلها من الداخل كدا بالظبط جميلة جدا "انا اصلى مش مصدقة انها نجحت معايا شكلا و طعما للدرجة اللى حصلت "



نجيب كيس نايلون " من اكياس التلاجة العادية " او كيس كريمة و نفتح الكيس من جهة واحدة فتحة بسيطة بحيث نقدر نصب بيه الكريم باسترى فوق الرقاقة الهشه زى كدا



و نكرر عملية الحشو و الطبقات " انا عملت طبقتين بس عشان كنت عامله عجينة قليلة "



نسد اى ثغرات و نهذب الجوانب كدا







دا الشكل النهائى ليها و نرش عليها سكر بودرة و نقدمها مع الشاى يا سلام ولا اروع و زى الجاهز بالظبط مفيش اى فرق غير اننا ضامنين الصنعة و النضافة و موفرين اكتر من70 فى الميه من تمن الجاهز

لو عاوزة تعملى كمية كبيرة ممكن تجهزى لعجينة و تحتفظى بيها فى الفريزر فى شكل لفات فى اكياس نايلون لحين الاستخدام بتخرجيها و تسيبيها تلين و تشكليها زى ما تحبى

كيلو الدقيق بياخد كيلو الا ربع زبدة و يطلع معاكى كمية رهيبة من الحلويات و الساليزون و المقبلات المختلفة

تم نشره في: حلويات شرقية وغربية